Mungiako Udalak udalerriko kale eta bideetako zoladura hobetzeko asfaltatze kanpainarekin jarraitzen du. Estratza Bideko lanak gaur amaituko dira, eta azaroaren 3an, asteartean, hasiko dira Gamiz Bideko 5. eta 15. zenbakien arteko tartea asfaltatzen.
Gamiz Bideko lanek irauten duten bitartean, aldaketak egongo dira aparkalekuan eta zirkulazioan, bai kale horretan, bai Aita Elorriaga kalean. Azaroaren 1ean, igandean, 20:00etatik aurrera, debekatuta egongo da bi kaleetako seinaleztatutako tarteetan aparkatzea. Azaroaren 2tik aurrera, Gamiz Biderako sarbidea itxita egongo da. Aita Elorriaga kalean, 9. zenbakitik 1. zenbakirako tartean, garajeetako erabiltzaileak salbuetsita egongo dira, eta zirkulazioa bi noranzkoetan ezarriko da. Udalak joan-etorriak aldez aurretik planifikatzeko eta behin-behineko seinaleztapena errespetatzeko eskatu die herritarrei.
Kanpainak 17 gunetako zoladura berritzea aurreikusten du, guztira 490.050 euroko inbertsioarekin. Lanak honako gune hauetan egingo dira: Gamiz Bidea 4-17, Herribide 16, Landetxo 1, Lauaxeta Olerkari 36-38, Goikoetxe Kalea 2-4, Torrontegi Bidea, Errota Bidea, Estratza Bidea eta Uriko Errota Bidea, Atxuri Bidea, Belako industrialdeko Makoaga 4 – Eneperi 2 – Mantzorri 2 tartea, Kipuzti Bidea, Añibarri Kalea 1 – Gamiz Bidea, Madalen Bidea 5, Zabalondoko industrialdeko Erreruena-Martintxu, Derio Bidea 48-52, Zabalondoko bidegorria, Eleizalde Bidea 16 eta Txirro Bidea.
Zoladura berritzeaz gain, hainbat jarduketatan irisgarritasuna eta bide-segurtasuna hobetzeko neurriak ere hartuko dira. Gamiz Bidean, esaterako, oinezkoentzako pasabidearen irisgarritasuna hobetuko da eta aparkalekuen antolaketa egokituko da, mugikortasun seguruagoa sustatzeko.
Udalak, gainera, hurrengo asfaltatze kanpaina prestatzen jarraitzen du; gaur egun, kontratazio-prozesuan dago. Helburua udalerriko bide-sarea mantentzen eta hobetzen jarraitzea da, kale eta bide seguruagoak, erosoagoak eta irisgarriagoak eskaintzeko.