Albisteak

Beko kale kaleko eta Arnaga Etxetaldeko saneamendu sarea handitzeko lanak lizitazio-fasean daude

Mungiako Udalak beste urrats bat egin du Beko kale kalea eta Arnaga Etxetaldeko saneamendu sarea handitzeko proiektuan, obrak lizitaziora aterata. Joan den uztailean iragarritako jarduketa honen helburua gaur egun udal sarera konektatuta ez dauden inguruko eraikinei irtenbidea ematea da.

Proiektuak 247.306,23 euroko aurrekontua du, eta lanak egiteko aurreikusitako epea sei hilabetekoa da. Lizitazioa azaroaren 3an argitaratu zen, eta interesa duten enpresek abenduaren 3ko 18:00ak arte aurkeztu ahal izango dituzte eskaintzak.

Jarduketaren bidez, saneamendu hoditeria Katetxe ondotik beilatokiaren pareraino luzatuko da, eta sare berriaren adar bat Arnaga Etxetaldean sartuko da. Horrela, gaur egun hobi septikoak erabiltzen dituzten etxebizitzek udal saneamendu sarera konektatzeko aukera izango dute, hondakin-uren kudeaketa hobetuz.

Gainera, Udalak jarduketa aprobetxatu nahi du errugbi zelairaino doan espaloia berritzeko, oinezkoen irisgarritasuna eta segurtasuna hobetzeko.