Mungiak futbolarekin hitzordua izango du irailaren 12an. Mungia Hiria Saria futbol txapelketa 17:00etan jokatuko da Legardako futbol zelaian, C.D. Mungiak antolatuta.
Jardunaldiak futbola eta kirola izango ditu protagonista, eta herritarrei txapelketara gerturatu eta taldeei animoak emateko gonbita egiten zaie.
📅 Irailaren 12a, larunbata
⏰ 17:00
📍 Legardako futbol zelaia
Mungiako eta Gatikako udalek elkarlanerako hitzarmena sinatu dute Atxuri auzoko bidearen segurtasuna eta egoera hobetzeko. Jarduketaren helburua Atxuri errekaren gainean dagoen egungo pasoa berritzea da, Sertutxa auzoan kokatutako bide batean, bi udalerrietako etxebizitzak lotzen dituena.
Gaur egun, errekaren azpiko pasoa hormigoi armatuzko hodi baten bidez egiten da, baina egiturak hainbat gabezia ditu eta uraren ebakuazioa ez da behar bezala egiten. Horrez gain, azterketa teknikoek adierazi dute beharrezkoa dela bidea indartzea, larrialdi egoeretan ibilgailu astunagoen joan-etorria bermatu ahal izateko.
Egitasmoak egungo zoladura kentzea, uraren pasorako egitura berria jartzea, hormigoizko elementu prefabrikatu berriak instalatzea, hormigoi armatuzko oinarri berria egitea eta bidea hormigoi armatuz berritzea jasotzen du. Era berean, harrizko euste-elementuak jarriko dira bidearen egonkortasuna sendotzeko.
Lanek 55.000 euroko inbertsioa izango dute, eta Mungiako eta Gatikako udalek erdibana finantzatuko dituzte. Mungiako Udala arduratuko da lizitazioaz, adjudikazioaz eta lanen zuzendaritza teknikoaz. Obrak egiteko aurreikusitako epea bi hilabetekoa da.
Lan nagusiak hasi aurretik, Mungiako Udalak Jainkoetxebarriko auzo bidea egokitzeko lanak hasi ditu, inguruko bizilagunen mugikortasuna bermatzeko. Izan ere, Atxuriko pasoa berritzeko obrek irauten duten bitartean, bidea itxita egongo da lanorduetan eta beharrezkoa izango da ordezko ibilbide bat izatea.
Jainkoetxebarriko bidea egokitzeko jarduketak 43.358,90 euroko inbertsioa izango du, eta aukera emango du auzoko bizilagunek eguneroko joan-etorriak modu egokian egiten jarrai dezaten, Atxuriko pasoa berritzeko lanak egiten diren bitartean.
