Udal ordezkaritza batek Afrikako herrialdea bisitatu du, lankidetza indartzeko eta garatutako proiektuen eragina ezagutzeko
10.000 pertsonak baino gehiagok jasotzen dituzte Mungiatik bultzatutako zerbitzuak.
Mungia, 2025eko azaroaren 20an. Mungiako Udaleko ordezkaritza ofizial bat, Alaitz Erkoreka Baraiazarra alkatea buru duela, Beninera joan da berriki, aita Theodore Soume buru duen Vida para Todos Fundazioarekiko lankidetzaren 20. urteurrena dela eta. Bi hamarkadatan zehar finkatutako aliantza horri esker, garapenerako lankidetza proiektu ugari garatu ahal izan dira Afrikako herrialdeko hainbat eskualdetan.
Bisitan, udal ordezkaritzak bertatik bertara ezagutu ahal izan du Fundazioarekin lankidetzan bultzatutako ekimenen benetako eragina, Mungiak tokiko komunitateekiko loturak sendotzeko duen konpromisoa berretsiz.
Proiektu aipagarrienen artean daude:
Emakume kooperatiba Siraroun: Prestakuntza gune bat, non dozenaka emakumek joskintza, alfabetatze, informatika eta enpresa kudeaketako teknikak ikasten dituzten. Kooperatibak bere autonomia ekonomikoa sustatzen du, laneratzea errazten du eta zaurgarritasun egoeran dauden familien bizi kalitatea hobetzen laguntzen du.
Banikoarako ospitalea: Herrialdeko gune behartsuenetako batean dago, eta udal finantzaketarekin eraiki eta hornitu dute. Larrialdi-zerbitzuak, medikuntza orokorra, amatasuna, kirurgia, farmazia eta laborategia eskaintzen ditu, 10.000 pertsonari baino gehiagori mesede eginez eta ama-haurren heriotza-tasa nabarmen murriztuz.
Eskolen eraikuntza: 20 urte hauetan zehar, gaur egun baliabide gutxiko komunitateetan haurrak eskolatzeko aukera bermatzen duten hainbat ikastetxe eraiki dira.
Edukiontziak materialarekin bidaltzea: Udalak, enpresekin eta tokiko erakundeekin lankidetzan, edukiontziak ibilgailuekin, makineriarekin, eskola-materialarekin, osasun-materialarekin eta material informatikoarekin bidaltzea finantzatu du, besteak beste.
Bisitak balio izan du, halaber, Vida para Todos Fundazioarekiko harremana estutzeko, tokiko agintariekin eta erakundeekin aliantza berriak ezartzeko, eta epe luzera garapena sortuko duten proiektu jasangarrietarantz aurrera egiteko.
Beninekiko etengabeko konpromisoaren erakusgarri, Mungiako Udalak Roscon Solidarioaren Jaiaren hurrengo edizioan bildutako dirua Vida para Todos Fundaziora bideratuko du.
Era berean, dibulgazio-kanpaina bat jarriko da abian, Mungiako bizilagunek nazioarteko lankidetza horren emaitzak sakon ezagutu ahal izan ditzaten.
“Beninerako bidaia hau guztiz argigarria izan da. Mungiako udalerriak 20 urte hauetan zehar babestu dituen proiektuen benetako eragina geure begiekin ikusteaz gain, errespetutik, elkartasunetik eta elkarren arteko lankidetzatik eraikitako harreman baten indarra sentitu dugu”, azpimarratu du Alaitz Erkorekak.
“Alkate naizen aldetik, harro nago Mungia historia honen parte delako. Baina badakit lankidetza ez dela soilik lagungarria: entzutea da, ikastea da, etorkizun bidezkoago baterantz elkarrekin joatea da. Kultura edo herri biok asko dugu ikasteko elkarrengandik. Horregatik, Beninekin eta Vida para Todos fundazioarekin dugun konpromisoa berresten dugu. Mungia herri solidarioa da, eta hemen horren adibide garbia dugu. Aliantza hori hazteko, indartzeko eta gehien behar dutenentzat aukera berriak izateko lanean jarraituko dugu ”, gaineratu du alkateak.