Errespetuan, berdintasunean eta askatasunean oinarritutako jarrerak ikusarazteko eta sustatzeko helburu nagusiarekin, Mungiako Udalak, bere berdintasun-zerbitzuaren bitartez, "Beldur Barik jarrera 2025" tokiko lehiaketaren edizio berri bat jarri du abian.
Mungian erroldatuta dauden edo herriko ikastetxeetan ikasten ari diren 12 eta 20 urte bitarteko gazteek parte hartu ahal izango dute.
Lanek, ikus-entzunezko formatuan, gehienez ere 3 minutuko iraupena izan beharko dute, eta originalak izan beharko dute, euskaraz, gaztelaniaz, bi hizkuntzetan edo beste hizkuntza batzuetan entregatu ahal izango dira, betiere euskarazko edo gaztelaniazko azpitituluak badituzte. Aipatzekoa da euskararen erabilera positiboki baloratuko dela.
"Beldur Barik programaren bidez, gure gazteei protagonismoa eman nahi diegu, askatasunez adierazteko eta gizarte justuago, berdintasunezkoago eta indarkeriarik gabeko gizarte bat eraikitzen duten balioei buruz hausnartzeko espazio bat eskaini nahi diegu. Bere begirada funtsezkoa da desberdintasunik gabeko etorkizunerantz aurrera egiteko", azpimarratu du Alaitz Erkoreka Baraiazarra Mungiako alkateak. "Mungia beti izan da berdintasunarekin eta parte-hartzearekin konprometitutako udalerria. Lehiaketa hau gazteen ahotsak entzuteko eta errespetuz eta sormenez eraldaketa sozialean duten inplikazioa aitortzeko aukera bat da", gaineratu du.
Tokiko sariak
Mungiako Udalak tokiko bi sari emango ditu, banakakoak edo taldekoak. 1. kategoriako saria (12-16 urte, 2009 eta 2013 artean jaiotakoak) 250 eurokoa izango da, eta bigarren kategoriakoa (17-20 urte, 2005 eta 2008 artean jaiotakoak), 350 eurokoa.
Epaimahaiaren erabakia Udalaren webgune ofizialean argitaratuko da (www.mungia.eus), eta irabazleei zuzenean jakinaraziko zaie.
Beldur Barik jarrera
Beldur Barik jarrerak “bere bikote edo bikote-ohiaren eskuz indarkeria fisikoa pairatzen duen emakume heldua”-ren estereotipoa gainditzea eskatzen du eta neska gazteek euren bizitzen esparru guztietan sufritzen dituzten indarkeria matxistaren manifestazio anitzak ikustarazteko lan egiten du, hauek euren eguneroko testuinguru eta esparru guztietan hautematen den desorekaren ondorio direlarik.
Beldur Barik jarrera gazteek sufritzen duten indarkeria matxistaren beste manifestazio batzuk (translesbohomofobia) hautematean ere datza. Honetarako, irudikapen sentsazionalistetatik eta melodramatikoetatik aldentzen da. eta indarkeria sexista eta indarkeria matxistaren beste adierazpenak ematea ahalbidetzen duten faktoreen inguruan hausnarketa egiten du.
Informazio gehiago: berdintasuna@mungialde.eus / 747 414 272 / 94 674 10 43