Kalejira Landetxo Goikoan (Izenduba Basoa) hasiko da 16:30ean eta udaletxean amaituko da 18:00etan, herriko kaleak zeharkatu eta gero. Ibilbidea bere formatu tradizionalean mantenduko du Udalak. Mungiako ikastetxeetako 200 mungiar baino gehiagok eta herriko hainbat elkartek emozioz beteriko ikuskizuna eskainiko dute udaletxean.
Urteko gaurik magikoena ospatzeko astebete besterik geratzen ez denean, Olentzerok eta Mari Domingik Alaitz Erkoreka Mungiako alkatearekin bildu dira Landetxo Goikoan abenduaren 24an izango diren kalejirako eta ongietorrirako azken xehetasunei buruz hitz egiteko. Izan ere, argi geratu da plana: 16:30ean abiatuko dira Landetxo Goikotik, euren etxetik, eta 18:00ak aldera iritsiko dira udaletxera, kaleetan zehar mungiarrei eta bisitariei agurrak, poza eta ilusioa banatu ondoren.
Horrela, urteko unerik ilusionagarrienetako baterako atzerako kontaketa hasten da, eta alkateak adierazi duen bezala, "ilusioa eta magia herritar guztien artean banatzeko unea da, batez ere txikienen artean. Mungia argiz eta kolorez beteta dago eta datorren igandeko ongietorria ikusgarria izan dadin gehiago apainduko dugu". Gaurko topaketari dagokionez, "niretzat ohorea da Olentzerorekin eta Mari Domingirekin pertsonalki hitz egitea, datorren igandeko kalejirari eta ongietorriari begira azken xehetasunak emateko. Batzuentzat lehen aldia izango da, beste batzuentzat asko izango dira, baina herritar guztientzat ohikoa dena da irribarreak izango direla, zalantzarik gabe, abenduaren 24ko arratsalde gauean".
Mungiak bere formato tradizionalarekin mantenduko du ibilbidea, beti ospakizun honen inguruan izan diren ohiturak errespetatuz. Kalejira Landetxo Goikoan hasiko da, eta Landetxo, Lauaxeta, Errekatxu, Ibaibide, Alkartasuna, Trobika, Erribide eta Elordugoitiako kaleak zeharkatuko ditu. Azkenik, udaletxean, mungiarrek abestiekin eta dantzekin hartuko dute kalejira. Bertan hasiko da Olentzerok eta Mari Domingik Mungiako haur bakoitzari eskaintzen dioten harrera. Ikuskizun hunkigarria izango da eta herriko ikastetxeetako eta herriko hainbat elkartetako 200 lagunek baino gehiagok hartuko dute parte.
2023an, Mungian Euskeraz Alkartea, Basapizti Taldea, Tallu Mendizale Taldea, Amilotx Dantza Taldea, Gure Ametsa Txistulari Taldea, J.M. Arregi Abesbatza, Txispeleta Eskaut Taldea, Udal Musika eta Dantza Eskola, Bentades Ikastetxea, Larramendi Ikastola, Laukarizko Eskola, Legarda Ikastetxea eta Guraso Elkarteak elkartu dira ikuskizunera. Udalak elkarte eta erakunde horiei guztiei euren partaidetza eskertzen die, izan ere, eurei esker "Olentzeroren Etorrera" posible egiten da.
Mari Domingik Olentzerori zuzendutako gutunak jasoko ditu
Aurretik, abenduaren 22an eta 23an, 17:00etatik 20:00etara, Mari Domingik Olentzerori zuzendutako gutunak jasoko ditu Izenduba Basoan. Gainera, abenduaren 22an, 18:00etan, Gabonetako postontzia jarriko da Matxin plazan Olentzerori eta Mari Domingiri zuzendutako gutunak uzteko, eta haurrek makillaje tailer batean parte hartu ahal izango dute.
Gabonetan bizi Mungia
Gabonak ez dira Olentzero eta Mari Domingi bakarrik, beraz, Mungiako Udalak, "Gabonetan bizi Mungia" lelopean, egitarau bizia prestatu du publiko guztientzat. Gabonetako Azoka, Gabonetako haur parkea, Gabonetako kantak, tailerrak, kale ikuskizunak, kontzertuak, zinea, haurrentzako jolasak, ur festa kiroldegian, herri kirolak, scape room bat eta talo postuak izango dira abendu osoan zehar egiten ari diren jardueren egutegia osatuko dutenak.
Amaitzeko, urtarrilaren 5ean, Errosko Jaia ospatuko da, Gabonetako erroskoaren banaketa tradizionala txokolate beroarekin. Ekitaldi honetan haurrentzako ikuskizun bat egongo da Gaur Jaia taldearen eskutik eta bildutako guztia STOP FA elkartearentzat izango da, Mungiako haur batek pairatzen duen Friedreicheko Ataxia izeneko gaixotasun arraro bat ikertzeko proiektua finantzatzen laguntzeko.
Programazio osoa www.mungia.eus helbidean dago eskuragarri.